Hvalaskoðun vinsælasta afþreying ferðamanna

Hvalaskoðun er ein vinsælasta afþreying erlendra ferðmanna á Íslandi en atvinnugreinin skilar þjóðarbúinu milljörðum króna árlega. Þorbjörn Þórðarson fréttamaður skellti sér í hvalaskoðun í Faxaflóa, en sjá má myndskeið af hrefnum í flóanum með fréttinni.

Hvalaskoðunarferðir eru ein vinsælasta afþreying erlendra ferðamanna á Íslandi, en atvinnugreinin á sér aðeins fimmtán ára þróunarferli hér á landi. Stöðugur straumur af ferðamönnum er við Reykjavíkurhöfn sem vilja skoða hrefnur, hnúfubaka, hnýsur og háhyrninga. Elding er eitt þeirra skipa sem gerir út hvalaskoðunarferðir en í þessum ferðum er siglt út á Faxaflóann á vit villtrar náttúrunnar.

Í morgun var ferðinni fyrst heitið í átt til Akureyjar að skoða lunda, en ekki vita allir að þar dveljast nokkur þúsund lundapör alla jafna. Um fimmtíu manns voru um borð, nánast eingöngu erlendir ferðamenn. Hans Neuenschwander frá Sviss er á meðal þeirra sem voru um borð í skipinu í dag en hann var mjög spenntur og sagði að hann yrði sáttur ef hann sæi a.m.k einn hval.

Á íslenskum hafsvæðum er mögulegt að rekast á yfir 20 tegundir hvala, en í Faxaflóa eru sex tegundir algengastar. Olga Goncharova var nýkomin til landsins frá Moskvu og skellti sér beint í hvalaskoðun. Þegar fréttastofa ræddi við hana höfðu hvalirnir ekki látið á sér kræla en Goncharova sagðist vonast til þess að það yrði raunin.

Á leið okkar út flóann sáum við tvær hnýsur, en þetta er minnsta hvalategundin í Faxaflóa og verður ekki mikið lengri en tveir metrar. Í fyrstu urðum við ekki vör við hrefnur, hin rússneska Olga var hins vegar bænheyrð því lengra út flóann birtust hrefnurnar við yfirborð sjávar, hver á fætur annarri og voru fimm til sex hrefnur sem fylgdu bátnum stóran hluta ferðarinnar. Þarna skapaðist þó andartak hinna fullkomnu andstæðna þegar hvalveiðiskipið Hvalur 9 sást við sjóndeildarhringinn draga kynsystur þeirra á land eftir vel heppnaðan veiðitúr.

Ein þeirra sem naut veðurblíðunnar á Eldingu í dag er hin hollenska Pauline Monshouwer sem hefur verið hér í tvær vikur. Var þetta hápunktur ferðarinnar, að sjá hrefnurnar í návígi? „Nei, reyndar ekki. Ég held að hápunkturinn hafi verið dvöl mín við Mývatn, stórbrotin náttúran þar og litirnir heilluðu mig," segir hún.

Magnús Guðjónsson, skipstjóri á Eldingu, segir að veðrið eins og það var í dag, 20+ stiga hiti og glampandi sól, sé algjörlega kjörið fyrir hvalaskoðun. Sjáið þið alltaf hvali í hverri ferð? „Já, nánast undantekingalaust. Það gerist bara örsjaldan, yfir erfiðasta tímabilið, að við sjáum ekki hvali," segir Magnús. Hann segir að það sé alltaf stöðugur straumur ferðamanna og Elding og önnur skip á vegum fyrirtækisins flytji allt upp í 150-170 farþega.

„Þetta er auðvitað eins sjálfbært og það getur orðið að sjá dýrin í sínu náttúrulega umhverfi. Og stórkostlegt að við skulum geta boðið upp á þetta á Íslandi," segir Magnús.