Umræðan villandi

Stefan Füle, stækkunarstjóri Evrópusambandsins, segir það vera áhyggjuefni hversu umræðan á Íslandi um sambandið sé óupplýsandi og jafnvel villandi. Þetta kom fram á blaðamannafundi í Brussel í morgun að lokinni ríkjaráðstefnu Evrópusambandsins og Íslands.

Ríkjaráðstefna Íslands og Evrópusambandsins markar upphaf aðildarviðræðna Íslands. Ráðstefnunni lauk skömmu fyrir hádegi að staðartíma en þá tók við hálftíma blaðamannfundur.

Füle sagði einnig að það væri íslenskra stjórnvalda að stuðla að upplýstari umræðu en hann kemur í opinbera heimsókn til Íslands í haust.

Belgar fara nú með formennsku Evrópusambandsins og sagðist Steven Vanackere, utanríkisráðherra Belgíu, styðja aðildarumsókn Íslands. Hann sagði að þrátt fyrir Íslendingar séu nú þegar búnir að taka upp mikið af regluverki Evrópusambandsins sé ljóst að það verði erfitt á ná samningi hvað varðar fiskveiði- og landbúnaðarmál. Hann væri hins vegar bjartsýnn á að hægt væri að ná niðurstöðu sem allir gætu sætt sig við.

Össur Skarphéðinsson utanríkisráðherra sagði að ef Ísland hefði gengið í Evrópusambandið fyrir fimm árum hefði það komið í veg fyrir efnhagshrunið. Össur ítrekaði ennfremur að Íslendingar hefðu margt fram að bjóða - ekki aðeins þekkingu á endurnýtanlegri orku og fiskveiðistjórnun heldur sé lega Íslands mikilvæg þegar kemur að framtíðarnýtingu orkuauðlinda á norðurheimskautssvæðinu og opnun nýrra siglingaleiða.

Þá sagði Össur að Icesave-deilan hefði dregið úr áhuga Íslendinga á aðild. Hann benti hins vegar á að stuðningur við aðild hafi sveiflast mikið í skoðanakönnunum á undanförnum árum og sagðist búast við því að stuðningur eigi eftir að aukast á næstu árum.