Ástarsaga í Herjólfi - skipstjórinn gaf þýskt par saman

Þýskt par var gefið saman um borð í Herjólfi í vikunni. Það var skipstjórinn sjálfur sem sá um hjónavígsluna en hann segir að athöfnin hafi verið ákaflega rómantísk.

Þetta er í fyrsta skipti svo vitað sé sem hjónavígsla fer fram í áætlunarsiglingu hér við land. Skipstjórinn á Herjólfi, Steinar Magnússon hefur upplífað ýmislegt á sjó á sínum ferli en aldrei þetta. En hvernig kom þetta til?

„Við vorum í hádegisferðinni á miðvikudag og þá kom ungt par til mín og spurði hvort ég vildi gifta þau," segir Steinar Magnússon skiptstjóri á Herjólfi.

Steinar hváði og tjáði parinu að hann hefði líklegast ekki réttindi til að vígja hjón en fyrir þrábeiðni þjóðverjana lét hann tilleiðast

„Þannig að þegar við komum til Vestmannaeyja fékk ég aðstoð hjá prestinum til að útbúa pappírana og klukkan fimm þegar við fórum af stað voru þau mætt og athöfnin fór fram inn í brú."

Og þannig voru þau Dirk og Manulega gefin saman af Steinari skipstjóra í viðurvist tveggja stýrimanna sem vottuðu.

„Já, þetta var bara alveg eins og það gerist best. Þau voru mjög ástfangin og þetta var falleg stund," segir Steinar þó hann efist um að þetta standist lög eins og þau séu uppáskrifuð - „...en ástin var alveg lögleg," segir hann og hlær.