Gagnrýna lífsýnatöku úr Bobby Fischer

Gagnrýnt er hvernig staðið var að lífsýnatöku úr stórmeistaranum Bobby Fischer. Rannsókn á lífsýnunum leiddi í ljós að stúlka sem taldi sig vera dóttir hans, er honum óskyld. Lögmenn hennar munnhöggvast í erlendum fjölmiðlum.

Samuel Estito, lögmaður Fillipísku konunnar Marylin Young, sem hélt því fram að Bobby Fischer væri faðir dóttur hennar, gagnrýnir hvernig staðið var að uppgreftrinum á líki Bobby Fischer. Hann segir Þórð Bogason, íslenskan lögmann konunnar, hafa lýst því yfir of snemma að ekki væri grundvöllur til að halda faðernismálinu til streitu og gefur í skyn að Garðar Sverrisson, návinur Bobby Fischer, gæti hafa átt við líkið til að koma í veg fyrir að niðurstaða næðist í faðernismálinu.

New York Times fjallar um málið á vef sínum í dag. Þar er vitnað í tölvupósta frá Þórði Bogasyni þar sem Þórður lýsir uppgreftrinum í þaula.

Að sögn Þórðar fór uppgröfturinn fram snemma morguns, kistan var opnuð í gröfinni og tjald reist til að hylja sýn. Viðstaddir voru fulltrúar allra þeirra sem gera kröfu í dánarbú Bobby Fischer. Sérfræðingar tóku sjö vefjarsýni úr líkama Bobby Fischer og kistunni var lokað aftur og gröfin blessuð af presti.

Samuel Estito gagnrýnir uppgröftinn. Hann segir að kistan hefði átt að vera færð upp á yfirborðið til að sannreyna að líkið væri örugglega af hinum látna stórmeistara. Þá bendir hann á að eignin sem kirkjugarðurinn tilheytri sé í eigu Garðar Sverrissonar, náins vin Miyoko Watai. Garðar hafi haft aðgengi að kirkjugarðinum og „hver veit hvað gæti hafa gerst milli jarðarfararinnar og uppgraftarins."

Þessum ásökunum svarar Þórður Bogason á þann veg að það sé enginn möguleiki að Garðar Sverrisson eða einhver annar gætu hafa átt við líkið og slíkar ásakanir jaðri við að vera meiðyrði.