Geir Waage á fund biskups í fyrramálið

Séra Geir Waage mun mæta á fund biskups Íslands klukkan tíu í fyrramálið samkvæmt upplýsingum frá biskupsstofu.

Upprunalega átti hann að mæta á fund í morgun en samkvæmt biskupsstofu tilkynnti Geir með talsverðum fyrirvara að hann gæti ekki mætt vegna skyldustarfa.

Ástæðan fyrir fundinum er grein Geirs sem birtist í Morgunblaðinu um helgina.

Þar reifaði Geir sjónarmið sín varðandi þagnarskyldu presta. Hann vill meina að þagnarskylda sé ofar landslögum og því beri prestum ekki skylda til þess að tilkynna um kynferðisbrot sóknarbarna sinna.

Í kjölfari sendi biskup Íslands, Karl Sigurbjörnsson, út tilkynningu þar sem sagði að skriftarbarn gæti ekki bundið samvisku presta.

Málið er einn angi af umræðunni um kynferðisafbrot innan kirkjunnar.