Fastur í London vegna fugls í hreyfli í Danmörku

Finnur Stefánsson farþegi með Iceland Express situr nú á Hilton hóteli í London. Hann átti að fara með flugfélaginu heim til Íslands í gærkvöldi en hefur litlar sem engar upplýsingar fengið frá félaginu í dag vegna seinkunarinnar. Upplýsingafulltrúi Iceland Express segir að seinkun sé vegna fugls sem lenti í hreyfli vélarinnar á leið Danmerkur.

„Ég átti bókað flug á Stansted með Iceland Express klukkan hálf ellefu í gærkvöldi. Þremur tímum fyrir brottför fæ ég SMS þar sem stendur að það sé búið að seinka fluginu til 1. ágúst, sem sagt í dag. Þar segir einnig að frekari upplýsingar koma síðar," segir Finnur.

Í dag fer Finnur svo, ásamt öðrum Íslendingum, út af hótelinu sem Iceland Express hafði útvegað þeim. „Þá kemur rúta og nær í okkur og fer með okkur upp á Gatwick flugvöll. Þar er enginn sem tekur á móti okkur eða segir okkur hvað við eigum að gera, þannig að við förum bara upp til að „check-a" okkur inn. Við sjáum það strax að það er þvílík röð og það er nokkuð ljóst að það voru ekkert allir að fara komast um borð í vélina," segir Finnur.

Hann fer því næst á þjónustuborð sem er þar nálægt. „Þar tala ég við afar hjálpsaman karl sem segir okkur að það sé allt lokað heima á Íslandi og þeir á Íslandi þurfa að sjá um það að bóka flug fyrir okkur. Hann getur ekki gert neitt fyrir okkur í dag og við þurfum bara að mæta í fyrramálið klukkan níu og þá skilst mér að það séu einhver 17 sæti laus, en það eru töluvert fleiri en sautján sem eru í sömu sporum og ég."

Hann segist vera í þeim sporum núna að þurfa að vakna í fyrramálið og „check-a" sig út. „Og ef ég kemst ekki í hádeginu á morgun þarf ég bara að ráfa um flugvöllinn, því næsta vél er klukkan átta annað kvöld. Ég er orðinn ansi þreyttur og langar heim til Íslands og ég veit að það eru fleiri það," segir Finnur en margir Spánverjar og Frakkar eru á leiðinni til landsins.

„Mér finnst vanta að við vitum eitthvað hvað er í gangi, það er ekkert verið að hafa samband við okkur eða neitt," segir Finnur.

Kristín Þorsteinsdóttir upplýsingafulltrúi Iceland Express segir í samtali við Vísi.is að fugl hafi flækst í hreyfli einnar af flugvélum Iceland Express á föstudag, sem var á leið til Billund í Danmörku, og það hafi raskað flugi félagsins nokkuð um helgina. „Farþegar urðu ekki varir við óhappið og vélin lenti á heilu og höldnu."

Hún segir að hins vegar hafi hreyfillinn þarfnast skoðunar flugvirkja sem fari alltaf fram þegar svona gerist. „Farþegarnir voru látnir vita af seinkunum á flugi með sms og tölvupósti," segir Kristín. Vegna fuglsins hafi þurft að fella niður flug á London Stansted og farþegum boðið að fljúga frá London Gatwick.

Þá segir hún að flugfélagið hafi eftir fremsta megni reynt að koma til móts við þá farþega sem hafa orðið fyrir óþægindum vegna þessa. „Reiknað er með að flug félagsins verði komið í eðlilegt horf í fyrramálið, mánudag."