Mál níumenninga: „Komið allir inn“

Fyrirtaka fer fram í máli svokallaðra níumenninganna í Héraðsdómi Reykjavíkur þessa stundina en fólkið hefur meðal annars verið ákært fyrir árás á Alþingi í búsáhaldabyltingunni í desember 2008.

Samkvæmt fréttamanni Stöðvar 2 sem er á staðnum fengu ekki allir að komast inn í héraðsdóm. Húsið var lokað þar til fyrirtakan hófst klukkan hálf níu og var einungis opnað rétt fyrir hálf. Þegar salurinn var orðinn fullur lokaði þingvörðurinn hurðinni að húsnæðinu.

Nokkrir lögreglumenn standa í anddyrinu og meina fólki að komast inn í húsið. Fólk er að berjast við að fá að koma inn og þeir sem eru inn í salnum reyna að opna fyrir þeim sem eru fyrir utan. Kona kallaði í gegnum hurðina þegar fyrirtakan var hafin: „Komið inn allir"

Stór lögreglubíll er fyrir utan héraðsdóm.

Síðast var málið tekið fyrir í lok júní og þá mættu tugir manna til þess að sýna níumenningunum stuðning í verki.