Hermann Maier á hundasleða uppi á Langjökli

Austurríska skíðastjarnan Hermann Maier var á Langjökli um helgina. Þar var skíðamaðurinn að taka upp auglýsingu fyrir austurríska bankann Raiffeisen sem er sérstakur styrktaraðili Maiers í nýstárlegri keppni milli Þýskalands og Austurríkis.

Keppnin snýst um að ganga yfir Suðurskautslandið á sex vikum og átti auglýsingin að fjalla um það á gamansaman hátt hvernig Maier farnast þar. Um var að ræða bæði kvikmyndatökur og venjulegar myndatökur.

Að sögn Einars Sveins Þórðarsonar hjá kvikmyndafyrirtækinu Pegasusi sem þjónustaði tökuliðið gengu tökur ágætlega fyrir sig þó að snjóleysi á jöklinum hafi sett smá strik í reikninginn.

"Við fengum hins vegar drauma-snjókomu á sunnudaginn og þá var hægt að klára þetta." Maier og félagar voru ferjaðir upp á jökulinn með þyrlum en yfir þrjátíu manns komu að gerð auglýsingarinnar. Leikstjóri hennar var þýskur en það var austurrískt fyrirtæki sem framleiddi hana. Einar Sveinn segir Maier hafa verið einstaklega ljúfan náunga og lausan við alla stjörnustæla.

Maier er einn sigursælasti skíðakappi heims og aðeins Ingemar Stenmark hefur unnið fleiri heimsbikarsigra en hann. Maier sló eftirminnilega í gegn á Vetrarólympíuleikunum í Nagano árið 1998 þegar hann vann tvö gull, eitt silfur og eitt brons.

Hins vegar virtist skíðaferill hans vera stefnt í hættu þegar hann slasaðist alvarlega í bifhjólaslysi árið 2001 en þá mátti litlu muna að hann missti framan af öðrum fæti sínum. Með stífri endurhæfingu og mikilli elju tókst Maier hins vegar að komast aftur á fætur og var mættur til keppni árið 2003.

freyrgigja@frettabladid.is