Þurfa ekki að læra um kristni

Foreldrar hafa fullan rétt á því að fara fram á, án skýringa, að börn þeirra taki ekki þátt í kennslu eða athöfnum sem viðkomandi telur ekki samræmast eigin skoðunum eða trúarbrögðum. Kemur þetta fram í lögfræðiáliti um samstarf kirkju og skóla sem unnið var að beiðni mennta- og menningarmálaráðuneytisins.

„Með álitinu er verið að skerpa skilin,“ segir Katrín Jakobsdóttir, mennta- og menningarmálaráðherra. „Það er til að mynda í lagi að fara í kirkju einu sinni á vetri en ekki í hverjum mánuði. Þetta var meðal annars gert til þess að upplýsa foreldra.“

Varðandi heimsóknir presta á skólatíma, segir í álitinu að nauðsynlegt sé að foreldrar séu látnir vita af þeim fyrirfram og gætt sé að því að ekkert ósamræmi sé í heimsóknum þeirra annars vegar og frá öðrum trúfélögum hins vegar. Heimsóknir skuli falla að skipulagi náms og vera í samræmi við það.

Lögmætt er að kenna kristin­fræði sem hluta af opinberu námsefni en skólar skuli þó bjóða börnunum önnur námsúrræði óski foreldrar eftir því.

Á heimasíðu ráðuneytisins kemur fram að álitið sé ekki sett fram sem skoðun ráðuneytisins, heldur einungis sem fræðileg og hlutlæg úttekt á þeim álitamálum sem um ræðir. - sv