Hlupu fyrir 30 milljónir króna

Áheit sem safnað var í tengslum við Reykjavíkurmaraþonið sem fram fór um helgina nálgast samtals 30 milljónir króna, samkvæmt upplýsingum sem fram koma á vef Reykjavíkurmaraþonsins. Það voru 98 góðgerðarfélög sem tóku þátt í áheitasöfnun.

Samkvæmt upplýsingum Vísis verður ekki gefið upp að svo stöddu hverjir söfnuðu hæstu áheitunum. Enn gæti bæst í því að söfnun áheita lýkur ekki fyrr en á miðnætti. Eftir því sem Vísir kemst næst hafa margir þeirra sem náðu góðum árangri í hlaupinu á laugardaginn lagt hart að sínum nánustu að viðurkenna árangur sinn með því að heita á þá eftirá.

Alls skráðu 10.444 sig til þátttöku í Reykjavikurmaraþoni þetta árið. Þar af voru 616 sem skráðu sig í maraþon, 1353 skráðu sig í hálfmaraþon og 3680 skráðu sig í 10 kilómetra hlaup. Þá voru 1670 skráðir í skemmtiskokk og 3071 voru skráðir í Latabæjarhlaupið.