Krefja Gylfa frekari svara um lánamálin

„Frá mínum bæjardyrum séð skiptir mestu að fá svör við því hvaða upplýsingar lágu fyrir þegar gengið var frá uppskiptingu gömlu ríkisbankanna. Hvernig menn voru undirbúnir þar,“ segir Magnús Orri Schram, þingmaður Samfylkingar og varaformaður viðskiptanefndar Alþingis.

Þingflokkur Samfylkingarinnar fær Gylfa Magnússon, efnahags- og viðskiptaráðherra, á sinn fund í dag til að fara yfir óvissuna um lögmæti gengistryggðra lána og svör hans við fyrirspurn um þau á þingi síðastliðið sumar, sem hávær umræða hefur verið um í þjóðfélaginu síðustu daga.

Að mati Magnúsar Orra hefur Gylfi útskýrt nægilega sína hlið málsins og beðist afsökunar á óskýrleika. „Ef menn biðjast afsökunar, þá skilur maður það. Þetta stendur hins vegar eftir og er stóra málið núna,“ segir Magnús, og vísar þar til samninga um kaup ríkisins á eignarhlut í viðskiptabönkunum þremur, sem urðu til þess að ríkið eignaðist í lok síðasta árs 81 prósent í Landsbanka, 13 prósent í Arion banka og fimm prósent í Íslandsbanka.

„Það var vitað að um lögmæti þessara lána var deilt, og þessi óvissa hefði átt að endurspeglast í samningnum. Þetta getur skipt okkur verulegu máli, sérstaklega hvað varðar Landsbankann,“ segir Magnús Orri.

Það var Steingrímur J. Sigfússon fjármálaráðherra sem stjórnaði samningaviðræðum um uppgjör bankanna. Hann segir algerlega ótímabært að vera með vangaveltur um áhrif óvissu um lánasöfn bankanna á samningana við ríkið: „Það verða einhverjir aðrir spraðabassar að æfa sig í því. Þarna eru miklir hagsmunir í húfi.“

Steingrímur segir að niðurstaða samninganna verði bara að fá að tala sínu máli. „Hún var að mínu mati ríkinu hagstæð og þýddi að ríkið batt í þetta miklu minna fé en upphaflega stóð til. Í öðru lagi held ég að aðferðin sem notuð var sanni gildi sitt í þessu, að það er slegið hring utan um ákveðna óvissu í eignamatinu eins og í tilviki Landsbankans. Í þriðja lagi er of snemmt að segja nákvæmlega til um það hvort og í hve miklum mæli þetta hefur áhrif vegna þess að við erum ekki komin með endanlega niðurstöðu dómstóla um það hvernig með þessi lán verði farið, og við erum heldur ekki komin með endanlega niðurstöðu í því hversu víðtækt umfangið verður.“

gudsteinn@frettabladid.is