Náttúran sýndi mátt sinn og megin

Náttúran sýnir mátt sinn og megin undir Eyjafjöllum. Gosið undir Eyjafjallajökli hefur brætt stóran hluta jökulsins og vatnið flæðir niður suðurhlíðar jökulsins og norðan megin niður í Markarfljót. Enn er þó nóg eftir af ís fyrir gosið að bræða. Hlaupið í Markarfljóti virðist aftur vera að færast í aukana eftir að hafa rénað nokkuð síðdegis.

Sjöhundruð manns þurftu að flýja heimili sín í skyndingu í nótt þegar almannavarnir lýstu yfir hættustigi vegna eldgoss undir toppbungu Eyjafjallajökuls. Jörðin rifnaði í sundur og logandi eldurinn hóf að bræða jökulinn í þann mund sem flestir voru að skríða á fætur í morgun.

Gríðarlegt magn af vatni streymdi hratt frá gígnum efst á jöklinum í norður í átt að Markarfljóti.

Vatnsyfirborðið hækkaði hratt og ógnaði bæði vegfarendum og mannvirkjum. Þjóðvegi eitt var lokað strax í morgun og um hádegi voru rofin skörð í veginn til að vernda nýju brúna yfir markarfljót. Fljótið náði samt sem áður að brjóta sér leið í gegnum veginn.

Jökulvatn og aur tók svo að streyma frá jöklinum beint niður suðurhlíðar Eyjafjallajökuls. Hvorki hefur frétst af tjóni á fólki né skepnum, en nokkurt eignartjón kannað hafa orðið vegna þess.

Eftir því sem leið á daginn óx krafturinn í hlaupinu í Markarfljóti og náði það hámarki um klukkan 2. Eftir það fór að draga úr hlaupinu.

Myndir sem myndatökumenn Stöðvar 2 náðu í dag sýna vel kraft hlaupsins, en aftur á móti sést á myndum sem teknar voru fyrir rúmri klukkustund að heldur hefur dregið úr hlaupinu. Nú rétt fyrir fréttir bjuggust menn þó við annarra hrinu í fljótinu.

Mannvirki við Landeyjahöfn og framkvæmdir þar sluppu vel, þó þær standi skammt frá þar sem Markarfljótið rennur til sjávar.

Lögregla hefur vaktað svæðið í allan dag og passað að fólk sé ekki á bannsvæðum. Bændum var í morgun hleypt inn á svæðið til að sinna skepnum, en þeir voru beðnir um að yfirgefa bæina að nýju þegar vöxtur hljóp í ár.