Hannaði skyrtuskraut sem kreppulausn

Tanja Sif Árnadóttir hannar skyrtuskraut fyrir herra og konur undir heitinu tANJA fOREVER. Skrautið er fáanlegt í Herrafataverslun Kormáks og Skjaldar.

„Ég byrjaði á þessu fyrir ekki svo löngu síðan. Ég var í hönnunarhóp og við ætluðum upphaflega að hanna barnaföt en ákváðum fyrst að byrja á því að hanna aðra hluti til að fjármagna framleiðslu barnafatanna.

Hinar stelpurnar fóru að hanna skart og ég skyrtuskrautið,“ segir Tanja Sif, sem er viðskipta- og markaðsfræðingur að mennt. Skyrtuskrautið fæst í einni stærð sem passar á flestar skyrtur og tekur Tanja Sif fram að skrautið passi einnig á sumar barnaskyrtur. „Það er svolítil kreppuhugsun á bak við þetta. Skrautið passar á hvaða skyrtu sem er og þess vegna er hægt að taka venjulega skyrtu og dressa hana upp.“

Aðspurð segist Tanja Sif hafa mikinn áhuga á hönnun herrafatnaðs og segist sjálf gjarnan klæðast skyrtum með bindi.

Skyrtuskrautið seldist upp stuttu fyrir jól en ný sending af skyrtuskrauti var væntaleg í Herrafataverslun Kormákar og Skjaldar þegar blaðamaður náði viðtali af Tönju Sif. „Ég á enn eftir að ná jafnvægi í framleiðslu og eftirspurn. Saumastofan sem ég hef notast við annar þessu ekki því það er svo mikið að gera hjá henni. Mig vantar eiginlega saumakonu sem er tilbúin til að taka þetta að sér, tilboð óskast,“ segir Tanja Sif og hlær. Í framtíðinni hyggst hún koma með fleiri vörur, bæði flíkur og fylgihluti, á markaðinn og nýja skyrtuskrautið verði líflegra og litaglaðara. -sm