Útlit fyrir gott veður norðan og austan til

Það stefnir í sumarauka um norðan og austanvert landið næstu daga með björtu, hlýju og tiltölulega stilltu veðri. Samkvæmt spá Veðurstofunar gæti hitinn farið upp í 17 stig norðanlands á morgun og svo upp í 20 stig norðaustanlands á fimmtudag og föstudag.

Áfram er spáð hlýindum á þessu svæði um helgina. Heimamenn á norðaustanverðu landinu taka þessu fagnandi eftir heldur kalsamt og þokugjarnt sumar, þegar sól og hiti gældu við landsmenn suðvestanlands. Þeir mega nú sætta sig við vætu og sólarleysi næstu daga.