Íhuga samúðaraðgerðir vegna verkfallsins

Slökkviliðsmenn á Reykjavíkur- og Keflavíkurflugvelli íhuga nú samúðaraðgerðir vegna verkfalls slökkviliðs- og sjúkraflutningamanna. Ljóst er að slíkar aðgerðir geta haft víðtæk áhrif á allt millilandaflug.

Líkt og komið hefur fram í fréttum undanfarið hafa slökkviliðs- og sjúkraflutningamenn átt í kjaradeilu við launanefnd sveitarfélaganna og hafa meðal annars beitt ýmsum verkfallsaðgerðum. Litlu mátti muna að samningur næðust á fundi fyrir viku en upp úr slitnaði.

Samninganefndin fundaði síðan á ný með launanefnd sveitarfélaganna í dag en þeim fundi var ólokið nú rétt fyrir fréttir. Samningar hafa verið lausir síðan 31.ágúst 2009. Í fyrramálið hefst 16 klukkustundar verkfall með tilheyrandi aðgerðum en um leið skellur á yfirvinnubann slökkviliðsmanna.

Slökkviliðsmenn á Reykjavíkur og Keflavíkurflugvelli eru með samning við Samtök atvinnulífsins í gegnum ÍSAVÍA, sem er rekstarfélag flugvallanna, en þeir hafa einnig verið með lausan samning síðan í lok ágúst á síðasta ári.

Þeirra samningaviðræður eru hinsvegar ekki komnar jafn langt og hjá kollegum þeirra en samkvæmt heimildum fréttastofu íhuga menn nú alvarlega samúðaraðgerðir enda orðnir langþreyttir á stöðunni.

44 slökkviliðsmenn eru nú starfandi á flugvöllunum tveimur en ljóst er að verkfall þeirra hefði víðtæk áhrif á flug til og frá landinu en upp undir 300 þúsund manns hafa farið frá Keflavíkurflugvelli undanfarið í hverjum mánuði.

Samskipti slökkviliðsmanna við launanefnd sveitarfélaganna eru mjög stirð eftir því sem næst verður komist en segja má að kornið sem fyllti mælinn í dag hafi verið þau tíðindi að starfandi bæjarstjóri á Akureyri beitti sér fyrir því að slökkvibíll yrði færður á flugvöllinn á Húsavík, en það telur Landssamband Slökkviliðsmanna vera verkfallsbrot.

Hugsanlegar samúðaraðgerðir verða ræddar á félagsfundi á morgun eftir því sem fréttastofa kemst næst og þá væntanlega tekin ákvörðun um hvort farið verði í verkfallsaðgerðir vegna málsins.