Landspítalinn þjónustar sjúklinga frá Færeyjum

Landspítalinn hefur gert tímamótasamning um þjónustu við sjúklinga frá Færeyjum. Samkvæmt samningnum verður sjúklingum sem Færeyingar þurfa að senda til annarra landa alla jafna vísað til Landspítalans en til þessa hafa sjúklingar í Færeyjum aðallega verið sendir til Danmerkur og Svíþjóðar. Þetta er fyrsti samningurinn sem gerður er við annað land um alhliða sjúkrahúsþjónustu á Íslandi, að því er fram kemur í tilkynningu frá Landspítalanum.

Um er að ræða rammasamning um sölu sjúkrahúsþjónustu Landspítala. Kaupandi er færeyska heilbrigðisráðuneytið fyrir hönd landssamtaka sjúkrahúsa í Færeyjum. Samningurinn nær til hvers konar sjúkrahúsþjónustu og á grunni hans má semja um frekari samvinnu svo sem að læknar Landspítlanum veiti þjónustu á sjúkrahúsum í Færeyjum.



Grundvöllur fyrir frekara samstarfi

„Samningurinn skapar grundvöll að frekara samstarfi, t.d. um meðferð sjaldgæfra sjúkdóma. Hann stuðlar að meiri nýtingu mjög dýrra tækja og búnaðar og hraðari endurnýjun á honum. Samningurinn getur líka aukið möguleika Landspítala á að taka upp nýja þjónustu sem áður hefur verið veitt erlendis þar sem fleiri sjúklingum stæði hún til boða nú en áður," segir í tilkynningunni. „Þannig geta líka skapast tækifæri fyrir heilbrigðisstarfsfólk með sérstaka þjálfun að flytja heim til Íslands og fá starf við hæfi."

Samningurinn var undirritaður í Þórshöfn í Færeyjum í dag. Samninginn undirrituðu Björn Zoëga, forstjóri Landspítalans, og Poul Geert Hansen, ráðuneytisstjóri færeyska heilbrigðismálaráðuneytisins. Álfheiður Ingadóttir, heilbrigðisráðherra, og Aksel V. Johannesen, heilbrigðisráðherra Færeyja, staðfestu samninginn jafnframt með undirritun sinni.