Borgarstjórn: Ólafur getur sjálfur óskað eftir lögreglurannsókn

Borgarfulltrúar Framsóknarflokks, Samfylkingar, Sjálfstæðisflokks og Vinstri grænna segja engar vísbendingar vera uppi um að flokkarnir hafi með neinum hætti brotið lög eða gengið gegn skyldum þeirra til að upplýsa um fjármál sín. Vilji Ólafur F. Magnússon, að fram fari lögreglurannsókn á styrkjum til flokkanna getur hann óskað eftir því á eigin ábyrgð, að mati borgarfulltrúanna.

Á sínum síðasta borgarstjórnarfundi í gær óskaði Ólafur eftir lögreglurannsókn á því hvernig flokkarnir í borginni hefðu varið styrkjum úr borgarsjóði. Tillögunni var hafnað með 14 atkvæðum gegn einu.

Í frávísunartillögu sinni vísa borgarfulltrúarnir í lög um fjármál stjórnmálasamtaka og frambjóðenda og að þar komi fram að Reykjavíkurborg sé skylt að veita stjórnmálasamtökum sem fengið hafa a.m.k. einn mann kjörinn í borgarstjórn eða hlotið a.m.k. fimm prósent í næstliðnum sveitarstjórnarkosningum fjárframlög til starfsemi sinnar. Í lögunum komi einnig fram að stjórnmálasamtök eigi að skila árlega reikningum sínum árituðum af endurskoðendum til Ríkisendurskoðunar sem birti í framhaldinu útdrátt úr reikningunum þar sem greint er frá helstu niðurstöðum.

Engar vísbendingar um lögbrot

Þá rifja borgarfulltrúarnir upp að borgarráð beindi þeim tilmælum sínum til stjórnmálasamtakanna sem fengu fulltrúa kjörna í borgarstjórn fyrir fjórum árum að þau gerðu grein fyrir því hvernig framlögum borgarinnar til þeirra á bilinu 2006-2009 hefði verið varið.

„Engar vísbendingar eru uppi um að stjórnmálasamtökin hafi með neinum hætti brotið lög eða gengið gegn skyldum þeirra til að upplýsa um fjármál sín, hvað ofangreind atriði varðar, sem er lágmarkskrafa fyrir því að óskað sé þeirrar lögreglurannsóknar sem tillaga borgarfulltrúans Ólafs F. Magnússonar gengur út á. Borgarfulltrúanum er hins vegar frjálst, á eigin vegum og á eigin ábyrgð, að óska slíkrar rannsóknar," segir í frávísunartillögu borgarfulltrúa Framsóknarflokks, Samfylkingar, Sjálfstæðisflokks og Vinstri grænna.