Tillaga um aðstoð við fátæka kolfelld

Tillaga Þorleifs Gunnlaugssonar, fulltrúa VG, í Velferðarráði Reykjavíkurborgar um að hækka fjárhagsaðstoð til einstaklinga um 17 þúsund krónur á mánuði og 22 þúsund krónur á mánuði var kolfelld á fundi ráðsins á föstudaginn. Fulltrúar Samfylkingarinnar, Sjálfstæðisflokksins og Besta flokksins greiddu atkvæði gegn tillögunni en Þorleifur greiddi einn atkvæði með henni.

„Það er eftirtektarvert að fulltrúar Samfylkingar, Sjálfstæðisflokks og Besta flokks í Velferðarráði hafa tekið höndum saman um að viðhalda sárri fátækt skjólstæðinga Reykjavíkurborgar. Sjálfstæðismenn eru reyndar samkvæmir sjálfum sér en það eru vonbrigði að fulltrúar Besta flokksins og Samfylkingar skulu nú sveigja af leið og hafna tillögu sem er í anda bókunar sem flokkarnir lögðu fram ásamt VG í vor," sagði Þorleifur í bókun sem hann lagði fram.

Þorleifur hefur þegar óskað eftir þvi að tillagan verði sett á dagskrá borgarstjórnar á þriðjudaginn kemur.