Telur stjórn Orkuveitu Reykjavíkur ekki fara að lögum

Júlíus Vífill Ingvarsson, borgarfulltrúi Sjálfstæðisflokksins, telur að samþykkt stjórnar Orkuveitu Reykjavíkur um að veita forstjóra heimild til að ákvarða breytingar á gjaldskrá á 6 mánaða fresti sé andstæð lögum um Orkuveitu Reykjavíkur frá árinu 2001.

Þetta kom fram í ræður hans í borgarstjórn í dag en þar gagnrýndi hann harðlega vinnubrögð stjórnar Orkuveitu Reykjavíkur. Þá sagði hann einnig að hækkun gjaldskráa rafmagns og heita vatnsins um 28,5 prósent sé allt of mikil og komi harkalega niður á fjölskyldum í landinu og að svo mikil hækkun muni augljóslega koma fram í aukinni verðbólgu og hækkunum á ýmsum nauðsynjum t.d. á grænmeti.

Hann sagði að stjórn Orkveitunnar væri óheimilt að veita forstjóra heimild til þess að ákvarða breytingar á gjaldskrá á 6 mánaða fresti. Hann bætti við að í lögum um Orkuveitu Reykjavíkur standi einfaldlega skýrt að stjórn fyrirtækisins setji gjaldskrár um verð á seldri orku og vatni til notenda. Auk þess taki gjaldskrár fyrir sölu á heitu vatni ekki gildi fyrr en þær hafa verið staðfestar af iðnaðarráðherra og birtar í Stjórnartíðindum.

„Stjórn getur ekki ákveðið að framselja þessar skyldur sína til forstjóra," sagði Júlíus síðan.