Samtök ferðaþjónustunnar mótmæla umhverfisgjaldi

Samtök ferðaþjónustunnar mótmæla harðlega útfærslu umhverfisgjalds í frumvarpi fjármálaráðherra um farþega- og gistináttagjald sem lagt hefur verið fram. Í yfirlýsingu frá samtökunum segir að fyrirtæki í ferðaþjónustu þoli illa auknar álögur og að þarna sé verið að leggja til flókið og illframkvæmanlegt kerfi sem leggur of þungar byrðar á fyrirtækin.

„Gert er ráð fyrir að sjóðurinn verði kr. 400 milljónir á ári sem er 8-10 sinnum hærri upphæð en stjórnvöld hafa talið hæfilegt að setja í málaflokkinn fram að þessu. Þar að auki á að tvískipta sjóðnum til að tvö ráðuneyti geti komið að málinu og er það til að flækja málið enn meira en orðið er," segir einnig og að lokum segja samtökin: „Mikilvægt er núna að slátra ekki mjólkurkúnni með síauknum gjöldum."