Heilbrigðisráðuneytið eitt fram úr fjárlögum

Heilbrigðisráðuneytið fór, eitt tólf ráðuneyta, fram úr fjárheimildum á fyrri hluta ársins. Skýrist það einkum með stöðu Sjúkratrygginga sem fóru rúman milljarð króna fram úr heimildum.

Þetta kemur fram í minnisblaði fjármálaráðuneytisins til fjárlaganefndar Alþingis um framkvæmd fjárlaga fyrri helming ársins.

Í minnisblaðinu segir að útgjöld ríkissjóðs séu í heild 13,3 milljörðum króna innan fjárheimilda og 22,2 milljörðum að teknu tilliti til fluttra fjárheimilda frá fyrra ári.

Fram kemur að rekstur stofnana sé að langstærstu leyti í samræmi við áætlanir. „Í heild sýnir uppgjörið að stofnanir og ráðuneyti halda almennt vel utan um útgjöld og eru í flestum tilfellum innan fjárheimilda. Liðum með útgjöld umfram heimildir fækkar verulega milli ára og nokkrar stofnanir sem undanfarin ár hafa átt við verulega rekstrarerfiðleika að etja, eru komnar innan fjárheimilda,“ segir í minnisblaðinu. Þessum árangri þurfi að fylgja vel eftir með áframhaldandi aðhaldi í rekstri til að tryggja megi að rekstur ríkissjóðs endi innan fjárheimilda á árinu öllu.

Þótt ráðuneyti í heild sé innan heimilda er ekki þar með sagt að hið sama gildi um alla fjárlagaliði þess. Þannig kemur fram í minnisblaðinu að átta framhaldsskólar voru reknar yfir heimildum. Einnig greiðslur vegna lífeyrisskuldbindinga, ríkisábyrgða og málskostnaðar í opinberum málum. Þá kemur fram að í tilvikum nokkurra liða sem enn eru innan heimilda hafi nú þegar verið óskað eftir viðbótarheimildum í fjáraukalögum vegna áætlaðs halla á síðari hluta ársins. Stærstu liðirnir sem þar um ræðir eru vaxtabætur, barnabætur og Fæðingarolofssjóður.

Styrking krónunnar á fyrri hluta ársins hefur nokkur áhrif á ríkisútgjöldin. Eru heildar­áhrif þess áætlaðir 1,5 milljarðar til lækkunar fjárheimildum. Enn er óvíst hvaða áhrif gengisþróunin hefur á endanlegar niðurstöður ársins. bjorn@frettabladid.is