Pakistan leikur tveimur skjöldum í Afganistan

Leyniþjónusta Pakistan aðstoðar Talibana í stríði við Bandaríkjamenn í Afganistan þrátt fyrir að fá milljarð dollara árlega frá Bandaríkjastjórn og vera yfirlýstur bandamaður Bandaríkjanna. Þá virðast Talibanar í Afganistan sterkari en nokkru sinni þrátt fyrir níu ára stríðsrekstur Bandaríkjamanna í landinu. Þetta kemur fram í leyniskjölum Bandaríkjahers sem vefsíðan Wikileaks birti í gærkvöldi.

Viðkvæmu leyniskjölin sem Wikileaks birti ná yfir 92 þúsund blaðsíður og fjalla á ítarlegan hátt um veru Bandaríkjahers í Afganistan. Þrjú dagblöð, The New York Times, breska dagblaðið Guardian og hið þýska Der Spiegel, fengu gögnin afhent fyrir mánuði síðan til að vinna úr þeim fréttir gegn því skilyrði að þær myndu ekki birtast fyrr en í fyrsta lagi í gærkvöldi.

Eitt af því sem gögnin afhjúpa er að leyniþjónusta Pakistan aðstoðar Talibana í Afganistan að berjast við Bandaríkjaher þrátt fyrir að vera yfirlýstur bandamaður Bandaríkjanna og þiggja eins milljarðs dollara fjárstuðning frá Washington árlega. Í gögnunum kemur fram að Pakistan heimilar pakistönsku leyniþjónustunni að eiga leynilega fundi með Talibönum í Afganistan. Þá koma fram upplýsingar um skýrslur hermanna á jörðu niðri í Afganistan sem eru reiðir þar sem Pakistan vilji ekki koma höndum yfir uppreisnarmenn sem hafi ráðist á afganska og bandaríska hermenn nálægt landamærunum og flúið yfir að árásunum loknum.

Þessar upplýsingar eru í hrópandi mótsögn við það sem komið hefur fram á yfirborðinu um samskipti Bandaríkjanna og Pakistan. Nú síðast fyrr í þessum mánuði var Hillary Clinton, utanríkisráðherra, í heimsókn í Islamabad og sagði ríkin tvö vera bandamenn og þá lofaði hún, við sama tilefni, hálfum milljarði dollara í fjárstuðning. Þá hafa aðrir fulltrúar ríkjanan tveggja sagt samskipti ríkjanna góð.

Í leynigögnunum kemur fram að þrátt fyrir að Bandaríkjamenn hafi eytt þrjú hundruð milljörðum dollara, jafnvirði 36 þúsund milljarða króna, í stríðsreksturinn í Afganistan séu Talíbanar í Afganistan öflugri en nokkru sinni síðan stríðið hófst árið 2001. Þessar upplýsingar ættu að draga þróttinn úr mörgum stuðningsmönnum stríðsins.

Ríkisstjórn Bandaríkjanna fordæmdi birtingu gagnanna í gærkvöldi. Bandaríska stórblaðið The New York Times sér ástæðu til að birta sérstakt bréf til lesenda sinna í blaði dagsins þar sem blaðið útskýrir hvers vegna það taldi nauðsynlegt að birta fréttir byggðar á gögnunum. Blaðið fer jafnfram yfir gögnin hafi öll verið sannreynd áður og reynst ósvikin. Þá hefur Bandaríkjastjórn ekki dregið áreiðanleika þeirra í efa.