Fagna merkingu erfðabreytta matvæla

Neytendasamtökin fagna þeirri ákvörðun Jóns Bjarnasonar, landbúnaðarráðherra, að setja reglugerð um merkingu erfðabreyttra matvæla. Reglugerðin mun kveða á um skyldu til að merkja sérstaklega allar matvörur sem seldar eru hér á landi og innihalda hráefni úr erfðabreyttum lífverum. Stuðst verður við samsvarandi reglur Norðmanna og mun ný reglugerð taka gildi fljótlega, með nauðsynlegum aðlögunartíma fyrir framleiðendur og söluaðila.

Á vef Neytendasamtakana segir að þau hafi um árabil krafist þess að settar yrðu reglur hér á landi um merkingu erfðabreyttra matvæla ekki síst í ljósi þess að Ísland sé eina ríkið í Evrópu þar sem engar slíkar reglur séu í gildi. Samtökin segja ennfremur að reglur um merkingu erfðabreyttra matvæla séu mikilvægar til að tryggja valfrelsi neytenda.