Erfðabreytt matvæli verði merkt sérstaklega

Jón Bjarnason, landbúnaðarráðherra, hyggst setja reglugerð um merkingu erfðabreyttra matvæla. Að því er fram kemur í tilkynningu frá landbúnaðarráðuneytinu mun reglugerðin kveða á um skyldu til að merkja sérstaklega allar matvörur sem seldar eru hér á landi og innihalda hráefni úr erfðabreyttum lífverum.

Stuðst verður við samsvarandi reglur Norðmanna og mun ný reglugerð taka gildi fljótlega, með nauðsynlegum aðlögunartíma fyrir framleiðendur og söluaðila. Þetta er í samræmi við samstarfsyfirlýsingu ríkisstjórnarinnar, en þar er því lýst yfir að tryggja skuli „að erfðabreytt matvæli séu merkt þannig að neytendum sé ljóst innihald matvæla við innkaup."