Sáttafundi slitið

Upp úr slitnaði á sáttafundi Slökkviliðs- og sjúkraflutningamanna og Launanefndar sveitarfélaganna, í húsakynnum Ríkissáttasemjara, um fjögurleytið. Viðræðunefndir aðilanna höfðu setið á fundi frá klukkan tvö og tekið upp þráðinn þar sem frá var horfið í viðræðum á fimmtudaginn var.

Slökkviliðs- og sjúkraflutningamenn telja sig hafa teygt sig all mikið í áttina að launanefndinni, en hún hafi ekki getað fallist á tillögur sínar. Þeir telja algjört bakslag hafa komið í viðræðurnar á fundinum í dag. Boltinn sé nú hjá launanefndinni.

Yfirvinnubann er hjá Slökkviliðs- og sjúkraflutningamönnum, auk þess sem þeir ganga ekki með boðtæki sín. Þeir hafa boðað dagsverkfall 27. þessa mánaðar og allsherjarverkfall frá 7. september, takist ekki samningar.

Sú staða sem upp er komin kynni að hafa áhrif á komandi menningarnótt í Reykjavík og Reykjavíkurmaraþonið, en þessir viðburðir verða um helgina. Bæði er von á miklum mannfjölda í miðborgina, auk þess sem slökkviliðs- og sjúkraflutningamenn hafa undanfarin ár, verið með viðbúnað í tengslum við maraþonhlaupið.