Vandræðabarnið Christoph Schlingensief látinn

Þýski listamaðurinn Christoph Schlingensief er látinn. Schlingensief var einn umdeildasti listamaður Þýskalands en samstarf hans við Klink og Bank á Íslandi vakti á sínum tíma mikla athygli.

Banamein Christoph Schlingensief var krabbamein. Schlingensief hefur oft verið kallaður "enfant terrible" þýska leiklistarheimsins. Bakgrunnur hans var í myndlistinni en hann bylti leiklistinni og vakti ávalt mikla athygli; þegar hann hvatti til aftöku Helmuts Kohl, þáverandi kanslara Þýskalands, stofnaði stjórnmálaflokkinn "Change 2000" sem vildi komast á þýska þingið árið 1998, eða þegar hann smalaði ólöglegum innflytjendum í gám í Vín árið 2000 í gjörningnum Burt með útlendinga (elskið Austurríki).

Schlingensief ögraði ekki bara þýskum leikhúsáhorfendum. Árið 2005 kom hann til Íslands og setti upp verk á vegum Klink og Bank og Þjóðleikhússins. Í verkinu, sem héti Animatograph, brenndi hann meðal annars eintak af Eddu og kastaði hrásalati í áhorfendur. Íslenski leikarinn Björn Thors lék í sýningunni og hélt samstarf hans við Schlingensief áfram en skömmu síðar fékk Schlingensief boð um að setja á svið Parsifal eftir Richard Wagner á óperuhátíðinni í Bayreuth. Er sá viðburður talinn einn sá áhrifamesti í þýsku listalífi síðustu ára.

Schlingensief hefur lengi barist við krabbamein. Yfirvofandi dauði hans hefur orðið honum umfjöllunarefni en það er kannski til marks um álit fólks á þessu vandræðabarni að mikið hefur verið rætt og deilt um hvort veikindi hans séu raunveruleg. Á dánarbeðinum þakkaði Schlingensief sýndan samhug en stillti sig ekki um að benda á - að lífið er í raun bara skítur.