Manndráp í Keflavík: Liðlega tvítugur maður í haldi

Lögreglan á Suðurnesjum hefur nú staðfest að maður sé í haldi, grunaður um að hafa orðið öðrum manni að bana í bænum. Hinn handtekni er liðlega tvítugur og verður hann yfirheyrður síðar í dag. Ekki er unnt að greina frá nafni hins látna að svo stöddu en borin hafa verið kennsl á hann. Hann var á sextugsaldri.

Lögreglan á Suðurnesjum var kvödd að húsi í Eyjabyggð í Reykjanesbæ laust eftir kl. 06 í morgun eftir að vegfarendur höfðu komið þar að karlmanni sem reyndist látinn. Áverkar á líkinu bentu til þess að dauða mannsins hefði ekki borið að með eðlilegum hætti. Hinn grunaði var síðan handtekinn á tíunda tímanum í morgun. Fjöldi lögreglumanna frá Lögreglunni á Suðurnesjum hefur unnið að rannsókn málsins með aðstoð lögreglumanna frá tæknideild Lögreglunnar á höfuðborgarsvæðinu.

Lögreglan ítrekar að rannsókn málsins sé þó enn á frumstigi og getur lögreglan ekki gefið frekari upplýsingar á þessari stundu.

Þeir sem telja sig geta veitt lögreglu einhverjar upplýsingar um málið eru vinsamlegast beðnir að hafa samband við Lögregluna á Suðurnesjum í síma 420 1700 eða á netfangið dc@dc.is.