Yfirheyra þarf tugi manna áður en varðhaldinu lýkur

Sérstakur saksóknari hyggst nýta tímann sem Hreiðar Már Sigurðsson og Magnús Guðmundsson, fyrrverandi bankastjórar Kaupþings, sitja í gæsluvarðhaldi til að yfirheyra alla þá sem tengjast meintum lögbrotum tvímenninganna.

Samkvæmt heimildum Fréttablaðsins eru þeir, sem talið er mjög brýnt að ná tali af áður en gæsluvarðhaldið rennur út, á þriðja tug, bæði sakborningar í málunum og vitni sem talin eru geta varpað frekara ljósi á málið.

Þeirra á meðal eru aðrir fyrrverandi stjórnendur úr Kaupþingi; þeir Sigurður Einarsson, fyrrverandi stjórnarformaður, Ingólfur Helgason, fyrrverandi forstjóri Kaupþings á Íslandi, og Steingrímur P. Kárason, fyrrverandi framkvæmdastjóri áhættustýringar bankans. Sigurður er búsettur í London en Ingólfur og Steingrímur í Lúxemborg og hafa þar rekið ráðgjafarfyrirtækið Consolium með Hreiðari Má.

Þremenningarnir hafa allir verið boðaðir í yfirheyrslur hérlendis í næstu viku en hugsanlegt er að þeim verði flýtt í ljósi atburða síðustu daga. Fram kom í fréttum Stöðvar 2 í gær að sérstakur saksóknari hefði þegar farið þess á leit við Sigurð að hann flýtti komu sinni til landsins en að hann hefði ekki sinnt þeim boðum.

Hreiðar og Magnús voru báðir úrskurðaðir í gæsluvarðhald í gær, Hreiðar í tólf daga og Magnús í sjö daga. Þeir kærðu báðir úrskurðina til Hæstaréttar, sem kveður upp dóma eftir helgi. Þangað til dvelja bankastjórarnir fyrrverandi í einangrun á Litla-Hrauni.

Ástæða varðhaldsins er grunur um stórfellda markaðsmisnotkun í starfsemi Kaupþings mánuðina fyrir hrun. Hún fór þannig fram að bankinn lánaði félögum, meðal annars á vegum sjeiks Al-Thani frá Katar, Skúla Þorvaldssonar og Kevins Stanford, háar upphæðir til að kaupa hlutabréf í bankanum. Þannig var komið í veg fyrir að gengi bréfa í bankanum félli. Alls námu þessi vafasömu viðskipti Kaupþings hátt í hundrað milljörðum. Inn í þetta fléttast önnur meint lögbrot, svo sem umboðssvik og skjalafals.

Sérstakur saksóknari rannsakar jafnframt mál af öðrum toga tengd Kaupþingi en þau liggja ekki beinlínis til grundvallar gæsluvarðhaldinu, samkvæmt heimildum Fréttablaðsins, þótt ekki sé útilokað að einnig verði yfirheyrt vegna þeirra á næstunni.

stigur@frettabladid.is