Minna ekið, drukkið og reykt en spáð var

Ríkissjóður var rekinn með 75,6 milljarða króna halla á fyrstu sjö mánuðum ársins. Greidd gjöld námu 318 milljörðum og innheimtar tekjur 261 milljarði. Þar munar 57 milljörðum. Að teknu tilliti til áhrifa rekstrartengdra eigna og skulda ríkisins, sem voru neikvæð um átján milljarða, fæst hin eiginlega staða, svonefnt handbært fé frá rekstri, sem nemur þessum 75,6 milljörðum.

Í yfirliti fjármálaráðuneytisins um greiðsluafkomu ríkissjóðs fyrstu sjö mánuði ársins kemur fram að innheimtar tekjur voru rúmum sautján milljörðum króna hærri en áætlun fjárlaga gerði ráð fyrir. Stafar frávikið að mestu af hagnaði ríkissjóðs af samkomulagi um kaup á íslenskum skuldabréfum af Seðlabankanum í Lúxemborg.

Tekjur af tekjuskatti einstaklinga námu 51,3 milljörðum. Það er aukning um tíu prósent frá fyrra ári en tæpum sex prósentum undir áætlun. Fyrirframgreiðsla á tekjuskatti lögaðila nam 7,1 milljarði sem er samdráttur upp á rúm 22 prósent frá í fyrra en svo til á áætlun ársins.

Í heild voru tekjur ríkissjóðs af sköttum, tollum og tryggingagjaldi 224 milljarðar fyrstu sjö mánuði ársins. Það er rúmum 27 milljörðum meira en í fyrra og tæpum fjórtán prósentum meira en áætlað var.

Virðisaukaskattur nam 70 milljörðum en í fjárlögum var reiknað með að hann yrði rúmir 60 milljarðar á tímabilinu. Vörugjöld af bensíni og olíu hækkuðu talsvert milli ára en voru undir tekjuáætlun. Sama á við um tekjur af áfengis- og tóbaksgjaldi. Þær jukust frá fyrra ári en voru lægri en áætlað var.

Útgjöld ríkisins fyrstu sjö mánuði ársins jukust um rúma níu milljarða frá árinu 2009. Engu að síður voru þau talsvert undir fjárheimildum ársins í ár. Að almannatryggingum og heilbrigðis- og velferðarmálum slepptum voru vaxtagreiðslur sá liður sem hvað þyngst vó á útgjaldahliðinni. Rúmir 50 milljarðar króna fóru til greiðslu vaxta á tímabilinu. Vaxtagreiðslurnar hækkuðu um sextán milljarða milli ára en voru þrátt fyrir það lægri en áætlanir gerðu ráð fyrir.bjorn@frettabladid.is