Vinnur gegn hagsmunum bænda og neytenda

Neytendasamtökin fullyrða að mjólkurfrumvarp landbúnaðarráðherra vinni gegn hagsmunum bænda og neytenda. Verði frumvarpið samþykkt verður einokun fest í sessi að mati samtakanna og því vilja þau að frumvarpið verði fellt á Alþingi.

Samkvæmt frumvarpinu verða lagðar fjársektir á mjólkursamlög fyrir að taka við mjólk frá framleiðanda sem ekki hefur svokallað greiðslumark eða eins konar framleiðslukvóta. Bæði Samkeppniseftirlitið og Samtök verslunar og þjónustu hafa gagnrýnt frumvarpið harkalega og segja það afturhvarf frá frjálsri samkeppni og það skerði atvinnufrelsi.

Neytendasamtökin hafa sent frá sér umsögn um mjólkurfrumvarpið svokallaða. Í umsögninni kemur meðal annars fram að samtökin leggjast alfarið gegn samþykkt frumvarpsins. „Bent er á að þegar Mjólka kom inn á markaðinn með kaupum á umframmjólk bænda keppti fyrirtækið við önnur mjólkursamlög. Við það hækkaði verð á mjólk umfram kvóta til bænda um leið og vörur sem Mjólka framleiddi í samkeppni við MS lækkuðu í verði," segir á vef Neytendasamtakanna.

Þar segir ennfremur: „Verði frumvarpið að lögum er lokað á alla samkeppni innan mjólkuriðnaðar. Neytendasamtökin telja hins vegar brýnt að frelsi sé aukið innan þessarar greinar. Því hvetja Neytendasamtökin til þess að frumvarpið verði fellt. Ef það verður ekki gert eru alþingismenn að fórna almannahagsmunum fyrir sérhagsmuni og það væri þá ekki í fyrsta skipti."