Steingrímur ætlar að halda áfram

Steingrímur Ari Arason, forstjóri Sjúkratrygginga Íslands, ætlar að halda áfram starfi sínu. Hann lítur ekki svo á að með því að skipa nýja stjórn yfir Sjúkratryggingum sé heilbrigðisráðherra að reyna að bola sér úr starfi.

Fréttablaðið greindi frá því í dag að Álfheiður Ingadóttir heilbrigðisráðherra hefði sett af stjórn Sjúkratrygginga og skipað nýja. Stutt er síðan að Álfheiður hugðist áminna Steingrím Ara Arason, forstjóra stofnunarinnar. Guðlaugur Þ. Þórðarson, fyrrverandi heilbrigðisráðherra, sagði í samtali við Vísi í dag að með breytingunum væri heilbrigðisráðherra að gera enn eina atlögu að Steingrími Ara.

Steingrímur segist sakna gömlu stjórnarinnar og formannsins, Benedikts Jóhannesar. „Ég vona í framhaldi af því að nú hefur verið skipuð ný stjórn að ég eigi jafn gott samstarf með nýju stjórninni," segir Steingrímur Ari í samtali við Vísi. Steingrímur Ari segir að starf forstjóra Sjúkratrygginga sé krefjandi starf. Hann sé ennþá á þeim aldri að hann hafi gaman að því að fást við krefjandi störf og því sjái hann fyrir sér að hann haldi áfram starfi sínu.