Metár í kvikmyndahúsum

Stórmynd James Cameron var tekjuhæsta kvikmynd síðasta árs þrátt fyrir að hafa verið aðeins tíu daga í sýningu. Jóhannes var vinsælasta íslenska kvikmyndin á árinu.

Samkvæmt lista sem SMÁÍS sendi frá sér náði kvikmynd James Cameron, Avatar, þeim ótrúlega árangri að vera tekjuhæsta kvikmyndin í íslenskum kvikmyndahúsum á árinu sem var að líða. Árangur sem verður eflaust seint sleginn enda var myndin frumsýnd um miðjan desember. Raunar náði Avatar toppsætinu af Hangover ekki fyrr en á síðustu sýningunni og var munurinn á þeim aðeins rúmar þrjátíu þúsund krónur. Avatar náði hins vegar ekki að skáka Hangover í áhorfendafjölda því fleiri sáu gamanmyndina eða rúm sextíu þúsund. Þeir hafa eflaust legið í krampakasti yfir Áramótaskaupinu sem hafði ótal tilvísanir í myndina. Kreppan virðist ekki hafa skotið rótum í kvikmyndahúsum borgarinnar því samkvæmt tölum frá SMÁÍS þá er árið 2009 það stærsta í sögu kvikmyndasýninga hér á landi. Aðsóknin jókst um sjö prósent og heildartekjur voru tólf prósentum meiri en árið 2008.

Gamanmyndin Jóhannes var vinsælasta íslenska kvikmyndin samkvæmt tölum frá SMÁÍS. Alls komu 36 þúsund gestir til að sjá Ladda fara á kostum með Unni Birnu Vilhjálmsdóttur sér við hlið og sjálfan Trölla, Stefán Karl Stefánsson. Aðstandendur Algjörs Sveppa og leitarinnar að Villa geta líka vel við unað; ríflega 32 þúsund manns greiddu sig inn á þessa eldhressu barna- og fjölskyldumynd með Sverri Þór og Vilhelm Anton í aðalhlutverki. Bjarnfreðarson, kvikmynd Ragnars Bragasonar, nær níunda sætinu þrátt fyrir að hún hafi ekki farið í almennar sýningar fyrr en 26. desember.

Sérstaka athygli vekur að tvær sænskumælandi myndir eru inni á topp tuttugu lista SMÁÍS. Það eru kvikmyndirnar Karlar sem hata konur og Stúlkan sem lék sér að eldinum sem báðar eru byggðar á samnefndum bókum Stiegs Larsson. Yfir áttatíu þúsund manns sáu þessar tvær myndir, rúm fimmtíu þúsund mættu á Karlar sem hata konur en þrjátíu á Stúlkuna sem lék sér að eldinum. Aðdáendur Larsson bíða spenntir eftir þriðju myndinni sem væntanleg er í kvikmyndahús von bráðar.

freyrgigja@frettabladid.is