Yrsa á hollensku

Réttindastofa Bjarts & Veraldar hefur gengið frá samningum við hollenska forlagið The House of Books um útgáfu á bókinni Sér grefur gröf eftir Yrsu Sigurðardóttur. Þar með er ljóst að bókin, sem er önnur glæpasaga Yrsu, kemur út á að minnsta kosti sautján tungumálum.

Sér grefur gröf var fyrsta verk hennar sem komst inn á erlenda metsölulista og hafa viðtökur við henni verið sérlega góðar. Má þar nefna að breska stórblaðið Times sagði í umsögn um bókina að Yrsa væri í hópi fremstu glæpasagnahöfunda Norðurlanda og blaðið Independent sagði að Sér grefur gröf hefði verið ein besta glæpasagan á markaðnum fyrir nýliðin jól.