Spila póker til styrktar Ellu Dís

„Allur ágóði af mótinu rennur beint til þeirra mæðgna og vonast ég til að sem flestir sjái sér fært að leggja okkur lið,“ segir Davíð Rúnarsson, einnig þekktur sem Dabbi Rú, eigandi Gullaldarinnar í Grafarvogi.

Á morgun klukkan 20 hyggst Dabbi halda sérstakt góðgerðapókermót á Gullöldinni til að safna upp í stofnfrumumeðferð fyrir Ellu Dís, en barátta hennar hefur ekki farið fram hjá Íslendingum. Mótið er haldið í samráði við Rögnu, móður Ellu Dísar, og hefur Dabbi unnið að skipulagningu síðustu fjórar vikurnar. „Tilgangurinn er að safna upp í stofnfrumumeðferð sem er áætluð núna í apríl 2011 og er það mín von og vilji að sem flestir sjái sér fært að mæta og styðja við gott málefni,“ segir Dabbi.

Fyrirkomulagið er þannig að það kostar 1.000 krónur að taka þátt í mótinu, en keppendur geta keypt sig inn eins oft og þeir vilja innan ákveðins tímaramma. „Heildarverðmæti vinninga er nú þegar komið í hálfa milljón og endar vonandi í einni kúlu svo ekki er einungis verið að styðja við frábæran málstað heldur er einnig til mikils að vinna,“ segir Dabbi, en vinningarnir koma úr ýmsum áttum. „Allar helstu stjörnur pókersamfélagsins munu taka þátt sem og einhverjir þjóðþekktir Íslendingar.“ - afb