Ákvarðana um orkuskipti brátt að vænta

Á næstu vikum kunna að liggja fyrir tillögur um skatta­ívilnanir og hvata frá hinu opinbera til fólks og fyrirtækja sem vill færa sig yfir í vistvæn ökutæki, eða breyta ökutækjum sínum þannig að þau verði vistvænni. Starfshópurinn var kynntur á ráðstefnu um visthæfar samgöngur í Háskólanum í Reykjavík í gær.

Katrín Júlíusdóttir, iðnaðarráðherra, segist gera ráð fyrir að hópurinn vinni hratt og skili ábendingum áður en endanleg mynd kemst á tillögur hans í haust.

Á ráðstefnunni í gær voru kynntar margvíslegar lausnir sem tengjast visthæfum samgöngum og sýndar voru bifreiðar sem ganga fyrir rafmagni, metani, lífdísil og vetni. Katrín segir hins vegar ljóst að það verði ekki stjórnvöld sem taki ákvörðun um hvaða tækni verði á endanum ofan á. „Tækniþróunin og markaðir erlendis ráða þessu,“ segir Katrín, en kveður það þó um leið sína tilfinningu að hér verði ofan á blönduð leið. „Aðstæður og aðgengi að orkugjöfum er svo misjafnt eftir löndum.“

Iðnaðarráðherra afhjúpaði í gær nýtt merki áætlunar um orkuskipti í samgöngum. Nýr vefur áætlunarinnar er www.graenaorkan.is.

Spurningum sem vakna um aðkomu stjórnvalda að uppbyggingu og áherslum í breyttu orkuumhverfi í samgöngum segir hún að verkefnisstjórnin, sem nú hafi verið skipuð, svari. Þar á meðal er spurningin um hvort olíufélögum verði gert að blanda lífrænni olíu í jarðefnaolíu í ákveðnum mæli, líkt og þegar hefur verið fyrirskipað í Noregi og í löndum Evrópusambandsins.

„Núna erum við í raun og veru að setja þetta átak af stað, en allt eru þetta hlutir sem verkefnastjórnin er að fara að vinna að. En við ætlum henni nú að gera áfangaskiptaáætlun, sem nær utan um framleiðslu á eldsneytinu, nýsköpun hvað varðar farartæki og uppbyggingu á innviðum,“ segir hún og vísar þar jafnt til aðgengis að ökutækjum sem og að eldsneytinu. „Í þriðja lagi þarf svo að skoða skattaumhverfið og hvatana þannig að þetta geti gerst hratt. Ég geri ráð fyrir að menn geti verið komnir með nokkuð góða mynd af þessari áætlun strax í haust. Og þá geta menn bara ætt af stað.“olikr@frettabladid.is