Össur: Tollmúrar Jóns algert brjálæði

Tollmúrar Jóns Bjarnasonar landbúnaðarráðherra á innfluttar landbúnaðarvörur eru algert brjálæði, segir Össur Skarphéðinsson utanríkisráðherra, og hvetur hann til að endurskoða ákvörðun sína.

Erlendar landbúnaðarvörur eins og kjötálegg, kjúklingabringur, nautalundir, villibráð og ostar fóru fyrst að sjást í íslenskum verslunum eftir að samkomulag tókst á alþjóðavettvangi um að þjóðir heims opnuðu glufur í tollmúra sem reistir höfðu verið til verndar innlendum landbúnaði.

Þegar Jón Bjarnason settist í stól landbúnarráðherra í fyrra var það eitt hans fyrsta verk að breyta framkvæmd á útreikningi tollkvóta þannig að tollmúrar snarhækkuðu. Þótt landbúnaðarráðherra annist framkvæmdina í þessu tilviki eru alþjóðasamningar á forræði utanríkisráðherra og sá er ekki sáttur.

Össur Skarphéðinsson kveðst telja að ákvörðun landbúnaðarráðherra fari algerlega gegn anda samningsins og þeirra laga, sem á honum byggi. Þetta sé ekki beinlínis lögbrot en fráhvarf frá fyrri stefnu.

„Ég er þeirrar skoðunar að þetta eigi að endurskoða og taka aftur," segir Össur.

Hann telur að þau rök sem Jón viðhafði í fyrra, að spara þyrfti gjaldeyri, séu fallin úr gildi. Nú sé staðan miklu betri og hann telji það alveg ljóst að þessi ákvörðun eyðileggi innflutningskvótana.

Össur tekur sem dæmi að þetta hafi valdið 20-faldri tollahækkun á frosnum nautalundum og 440 prósenta tollahækkun á kjúklingabringum, og kallar þetta upp á dönsku algert brjálæði.

„Ég segi það alveg eins og er að mér finnst þetta bara „det gale vanvid"," segir Össur. Spurður hvort hann hafi nefnt þetta við ríkisstjórnarborðið, svarar hann: „Ég segi alltaf hug minn við ríkisstjórnarborðið og gerði það síðast í morgun."