Miðborgin hrein að nýju

Miðborgin er orðin hrein og fín að nýju eftir að um 100 þúsund manns komu saman þar þegar að menningarnótt náði hámarki.

Jón Halldór Jónasson, upplýsingastjóri framkvæmdasviðs Reykjavíkurborgar, segir að það hafi gengið vel að hreinsa enda hafi nokkuð öflugur hópur verið þar að verki. „Menn skiptu með sér vöktum og þegar einn hópurinn fór af vaktinni um hálftvö um nóttina tók annar við og þetta var búið um tíu á sunnudagsmorgni," segir Jón Halldór. Hann segir að alls hafi um 30 manns verið að hreinsunarstörfum.

Jón Halldór segir að ruslið á menningarnótt hafi ekki verið neitt meira en venjulega. „Það fellur alltaf eitthvað til en það er líka bætt við ruslafötum og einhverjum gámum líka," segir Jón Halldór. Hann segir að almennt gangi bæði verslunareigendur og almenningur vel um.