Enn verið að yfirheyra - enginn gistir fangageymslur

Ólafur Þór Hauksson, sérstakur saksóknari, segir að yfirheyrslum vegna rannsóknar embættisins á Glitnismálinu sé ekki enn lokið. Hann á von á því að yfirheyrslum verði lokið um miðnætti.

Þá segir hann að ekki liggi fyrir neinar beiðnir um gæsluvarðhald eins og sakir standa núna. Rannsókn embættisins mun halda áfram á morgun.

Eins fram kom í fréttum Stöðvar 2 í kvöld voru húsleitir framkvæmdar á skrifstofu Jóns Ásgeirs Jóhannessonar á 101 Hóteli, skrifstofu Pálma Haraldssonar og heimili Lárusar Welding. Rannsóknin tengist lánveitingum Glitnis og nemur fjárhæð viðskiptanna um sjötíu milljörðum króna.