Umdeilt málverk af Ólafi Skúlasyni fært

Búið er að færa málverkið af Ólafi Skúlasyni, fyrrverandi biskupi, til á biskupsstofu. Málverkið öðlaðist óvænta frægð þegar mynd af þeim Karli Sigurbjörnssyni og Geir Waage birtist á Vísi og í Fréttablaðinu þar sem Ólafur Skúlason horfði yfir öxl þeirra.

DV greinir frá þessu á vef sínum. Þar er vitnað í Steinunni Björnsdóttur, upplýsingafulltrúa Biskupsstofu, sem segir að málverkið hafi verið tekið niður af þeim stað sem það var á af tillitssemi við tilfinningar fólks.

„Við sáum það líka á viðbrögðum við myndinni af biskupi og Sér Geir Waage að þetta vakti upp sárar tilfinningar á meðal fjölda fólks."

Óhætt er að segja að fáar fréttamyndir hafi vakið jafn mikla athygli síðustu misseri en myndin var tekin þegar Karl Sigurbjörnsson biskup og Geir Waage funduðu vegna ummæla þess síðarnefnda um þagnarskyldu presta. Sama dag baðst kirkjuráð afsökunar fyrir hönd kirkjunnar á misnotkun Ólafs Skúlasonar á hendur dóttur sinni og öðrum konum.