Alvarlegur misbrestur varð á að tilkynna um vinnuslys

Alvarlegur misbrestur virðist hafa orðið á að tilkynna réttum aðilum um alvarlegt vinnuslys sem varð á kjúklingabitastað KFC í Kópavogi í gærkvöldi. Þrír starfsmenn staðarins brenndust og liggur einn þeirra á gjörgæsludeild.

Hann verður þó líklega útskrifaður á aðra deild í dag, að sögn læknis. Hann brenndist í andliti, á brjósti og á höndum. Annar var lagður inn á almenna deild í nótt, eftir aðhlynningu, en sá þriðji var útskrifaður eftir að gert hafði verið að sárum hans.

Samkvæmt Helga Vilhjálmssyni, aðaleiganda KFC var hringt á Neyðarlínuna, en þar hafi verið sagt að best væri að hringja á leigubíl og senda mennina með honum á Slysadeild, sem var gert.

Nú er verið að kanna hjá Neyðarlínunni hvort svo hafi verið, og líka af hverju hún lét lögreglu ekki vita. Slysið varð laust fyrir klukkan tíu í gærkvöldi, en lögregla frétti ekki af því fyrr en 18 mínútur yfir miðnætti, þegar aðstandandi eins hinna slösuðu hringdi í lögregluna til að spyrjast fyrir um líðan hans.

Rannsóknalögreglumaður var þá sendur á staðinn, en þá voru aðeins rafvirkjar þar að lagfæra raflagnir. Vinnueftirlitið vissi ekki af málinu fyrr en fréttastofan spurðist fyrir um rannsókn á því í morgun, en það er nú farið að kanna málið.