Innanlandsflug liggur niðri

Innanlandsflug mun liggja niðri að minnsta kosti til klukkan hálfeitt í dag, samkvæmt upplýsingum frá Flugfélagi Íslands vegna gosmakkarins sem leggur yfir suðvesturhluta landsins. Kannað verður með flug klukkan hálfeitt.

Af millilandaflugi er það að frétta að Icelandair gerir ráð fyrir að Keflavíkurflugvöllur verði lokaður, að minnsta kosti fram á þriðjudag. Flugi félagsins verður því beint frá Akureyrarflugvelli til Glasgow og verður flogið þaðan á milli tvisvar til þrisvar sinnum á hverjum degi. Fyrsta flug til Glasgow fer klukkan eitt. Flugvöllurinn í Glasgow verður miðstöð millilandaflugs Icelandair fram yfir helgi. Flugvélar Icelandair fljúga þaðan til og frá Bandaríkjunum og til og frá áfangastöðum í Evrópu.

Farþegar eru hvattir til að fylgjast með flugi á vefsíðum flugfélaganna.