Tvö höfuð Jóhannesar

Jóhannes Haukur Jóhannes­son leikur Þorgeir Hávars­son í leikritinu Gerplu sem frumsýnt verður 12. febrúar. Leikmunadeild Þjóðleikhússins er tilbúin með fremur óhefðbundinn leikmun tengdan honum.

„Manni finnst þetta svolítið óhugnanlegt, sérstaklega að þetta eru eftir­myndir af manni,“ segir Jóhannes Haukur Jóhannesson. Honum brá heldur betur í brún þegar hann rölti niður í leikmunadeild Þjóðleikhússins fyrir skömmu. Höfuð hans hafði þá verið steypt í silíkon.

Starfsmenn deildarinnar voru að leggja lokahönd á höfuð Þorgeirs sem verða notuð í sýningunni. Tvö silíkonhöfuð hafa verið búin til, eitt sem lítur út fyrir að vera nýhöggvið af búknum og annað sem er farið að rotna. „Það var rosalega erfitt að sitja inni í þessu móti. Það tók fjörutíu mínútur og ég þurfti að sitja útataður í silíkon-dóti. Svo eru þeir búnir að föndra við þetta í rúman mánuð og þetta er útkoman,“ segir Jóhannes sem finnst áferðin á höfðunum sérlega ógeðsleg.

Leikritið, sem Baltasar Kormákur leikstýrir, er byggt á Gerplu og fer Björn Thors með hlutverk hins fóstbróðurins, Þormóðs, sem fær höfuð Þorgeirs sent til sín. Jóhannes tekur fram að hann fái alveg að leika í sýningunni þrátt fyrir höfuðleysið. „Við fáum líka að sjá áður en ég er drepinn. Svo er ákveðinn kafli þar sem höfuðið sér bara um þetta fyrir mig og ég er bara í kaffisopa.“

Undirbúningurinn fyrir verkið hefur verið langur og hafa æfingar verið haldnar með hléum síðan í maí í fyrra. „Það eru fjórtán mánuðir síðan Baltasar talaði fyrst við mig um að gera þetta. Þetta er búin að vera löng fæðing en skemmtileg og það er bara endaspretturinn eftir,“ segir hann. „Þetta er uppáhaldsbók margra og það eru margir spenntir að sjá hvernig til tekst. Ég held að við getum verið stolt af því sem við erum að gera. Ég held að fólk eigi eftir að verða ánægt með þetta.“ -fb