Kynjakvóti flækti endurröðun á lista

Kynjakvóti á framboðslista Framsóknar í Reykjavík flækti endurröðun eftir að Guðrún H. Valdimarsdóttir hagfræðingur, sem var í öðru sæti, sagði sig frá listanum á mánudag. Niðurstaðan varð að Valgerður Sveinsdóttir lyfjafræðingur færist upp um sæti og skipar annað sætið. Þuríður Bernódusdóttir færist úr 11. sæti í það þriðja en Bryndís Guðmundsdóttir bókari kemur ný inn og mun skipa 11. sætið.

Einar Skúlason, oddviti flokksins í Reykjavík, segir að upplýsingarnar, sem Guðrún hafi að eigin frumkvæði nefnt, um þátt fyrirtækis eiginmanns hennar í skýrslu rannsóknarnefndar Alþingis hafi vakið mikinn óróleika á listanum.

„Menn voru ekki á eitt sáttir um hvernig bæri að leysa málið og frambjóðendur óttuðust umræðuna sem kynni að vakna í aðdraganda kosninga,“ segir hann. Mat manna hafi því verið að betra væri að biðja Guðrúnu að víkja sæti fremur en að hætta á að aðrir segðu sig frá framboðinu. Hann telur að Guðrún sé á vissan hátt fórnarlamb þeirrar tortryggni og reiði sem nú sé ríkjandi í samfélaginu. Hann áréttar að þeir sem mestar áhyggjur hafi haft af upp kominni stöðu hafi ekki einskorðast við ákveðna hópa innan flokksins. „Þarna var líka fólk úr stuðningsmannahópi Guðrúnar.“

Guðrún segir sjálf að ákvörðunin um að biðja hana að víkja hafi komið mjög á óvart. Hún hafi viljað hafa vaðið fyrir neðan sig og benda á að nafn fyrirtækis eiginmanns hennar kæmi fyrir í skýrslu rannsóknarnefndarinnar, ef svo ólíklega myndi vilja til að pólitískir andstæðingar „legðust svo lágt“ að reyna að sverta hana með því. „Ég er hætt í pólitík og mun aldrei aftur reyna fyrir mér á þeim vettvangi,“ segir hún og kveðst vilja einbeita sér að öðrum málum.- óká