Það er enginn Evrópuher fyrir börnin

„Það er enginn Evrópuher til fyrir börnin að fara í og ef einhver myndi vilja neyða þau í her, þá gæti það einmitt verið NATO, sem Ísland hefur verið hluti af í sextíu ár,“ segir Alyson Bailes, fyrrum sendiherra Breta í Finnlandi og aðjúnkt við HÍ.

Orðin lét hún falla á opnum fyrirlestri Alþjóðamálastofnunar í gær, spurð um auglýsingar ungra bænda á Íslandi, sem vara við því að fylgifiskur ESB-aðildar sé herskylda Íslendinga.

Bailes segir að verði „bylting“ í evrópskri varnarstefnu eftir einhver ár og Bandaríkin dragi sig í hlé frá Evrópu og Evrópuþjóðir ákveði þá að þær vilji vinna saman að vörnum, þá sé mögulegt að Íslandi yrði boðið að taka þátt í Evrópuher.

„En sem aðildarríki myndi það hafa neitunarvald,“ segir Bailes.

Hún segir að til hafi staðið að þjóðir Evrópu ynnu saman að varnarmálum eins og öðru í árdaga Evrópusambandsins, og aðildarríkin hafi heitið hvert öðru stuðningi, en NATO hafi leyst þær hugmyndir af hólmi að lokinni annarri heimsstyrjöld og í kalda stríðinu.

Að loknu Balkanskagastríði var rætt um þetta að nýju í Evrópu og úr urðu aðstoðarsveitir og friðargæsla, mjúkur hernaður vegna styrjalda utan sambandsins, segir Bailes. Langt í frá Evrópuher.

„Sumir myndu halda því fram að stækkun sambandsins væri meginvarnarstefna ESB,“ segir Bailes. Með því að setja nágranna sína þannig undir sömu lög væri Evrópa að byggja upp æ stærra öruggt svæði. - kóþ