HB Grandi biðst afsökunar á grút

Mikil mengun frá frystihúsi HB Granda hefur mengað höfn og fjörur á Vopnafirði í sumar. Höfnin og ströndin í grennd við þéttbýlið hafa verið löðrandi í grút. HB Grandi hefur beðið bæjarbúa afsökunar með bréfi sem fyrirtækið lét bera í öll hús í plássinu.

„Við munum gera allt sem í okkar valdi stendur til að koma fráveitumálum okkar í fyrirmyndar-lag og hraða því ferli eins og hægt er,“ segir í bréfi HB Granda sem er birt á heimasíðu Vopnafjarðarhrepps. „Við biðjum íbúa Vopnafjarðar enn og aftur afsökunar á þessu.“

Mengunin er rakin til bilunar í búnaði og til þess að frárennsli frá frystihúsi Granda hafi verið meira en búist var við. „Það hefur aldrei verið unnið annað eins magn af síld og makríl í uppsjávarfrystihúsinu og nú í sumar,“ segir í bréfi HB Granda. „Nú er t.d. búið að frysta rúm 7.500 tonn af afurðum á móti 1.200 tonnum í fyrra. Við þessa vinnslu er að falla til gífurlegt magn af fitu og hafa tæki okkar og úrræði greinilega ekki verið nægilega viðbúin því.“

Hreinsun á fjörunni er hafin og einnig hefur HB Grandi falið verkfræðistofu að gera tafarlausa úttekt á fráveitumálum. -pg