Vill refsa óheiðarlegum rjúpnaskyttum

Formaður Skotveiðifélags Íslands telur nauðsynlegt að refsa þeim sérstaklega sem brjóta gegn sölubanni með rjúpur. Tæplega áttatíu og fimm þúsund rjúpur veiddust á síðasta ári en þar af voru tveir veiðimenn með sextán hundruð rjúpur.

Skotveiðifélag Íslands og umhverfisstofnun efndu til blaðamannfundar á Kringlukránni í dag en rjúpnaveiðitímabilið hefst á föstudag.

Að minnsta kosti 85 þúsund rjúpur veiddust á síðasta ári sem er nokkuð yfir tilmælum Náttúrufræðistofnunar Íslands. Mun fleiri veiðkort seldust á síðasta ári og rjúpnaveiðimönnum fjölgaði verulega eða um átta hundruð.

Hvað skýrir þessa aukningu að þínu mati? „Það er örugglega aðstæður í þjóðfélaginu. menn eru frekar heima eru ekki að fara til útlanda og nýta tímann til að fara til veiða t.d.þetta er bara nýtt sport fyrir suma örugglega," segir Steinar Rafn Beck, sérfræðingur hjá Umhverfisstofnun.

Ákveðið var að hvíla rjúpnastofninn fyrir nokkrum árum með því að takmarka veiðar en nú er talið að veiðarnar séu sjálfbærar.

„við erum að veiða einhver tíu prósent af stofninum og ég mundi telja hana vera sjálfbæra," segir Steinar Rafn.

Að meðaltali var hver veiðimaður að veiða um 10 til 15 rjúpur. Tveir veiðimenn voru hins vegar með samtals sextán hundruð rjúpur eða um tvö prósent af heildarveiði. Þetta vekur athygli því bannað er að selja rjúpur.

„En við höfum áhyggjur af því að við vitum um hóp magnveiðimanna sem eru að selja og yfirvöld eru ekki að fylgjast með þessu eins og þurfa þykir. Þannig að menn hafa komist upp með, þetta því miður," segir Sigmar B. Hauksson formaður Skotveiðifélags Íslands.

Sigmar segir nauðsynlegt að bregðast við þessu - jafnvel beita refsingum.

„Það mætti hugsa sér að taka af þeim veiðikort jafnvel svipta skotvopni," segir Sigmar að lokum.