Rannsóknarnefnd skoðar lífeyrissjóðina

Landssamtök lífeyrissjóða minna á að Ríkissáttasemjari hefur skipað rannsóknarnefnd að ósk samtakanna til þess að rannsaka og kanna fjárfestingarstefnu, ákvarðanir og lagalegt umhverfi lífeyrissjóðanna í aðdraganda bankahrunsins.

Þetta kemur fram í tilkynningu frá samtökunum.

Tilefni hennar eru tveir viðmælendur sem hafa verið í ljósvakamiðlum í vikunni og fjallað um lífeyrissjóði landsins. Báðir hafa þeir talið þörf á að rannsaka starfsemi þeirra.

Þetta eru annars vegar Guðrún Johnsen hagfræðingur, sem var í viðtali á Stöð tvö síðastliðinn mánudag, og síðan Guðni Ágústsson, fyrrverandi alþingismaður, sem var í morgunútvarpi Rásar 2 í Ríkisútvarpinu í dag.

Í tilkynningunni frá samtökunum segir að það séu þau Hrafn Bragason, lögfræðingur og fyrrverandi hæstaréttardómari, formaður, Guðmundur Heiðar Frímannsson, siðfræðingur og prófessor við Háskólann á Akureyri og Héðinn Eyjólfsson, viðskiptafræðingu, sem skipa nefndina.

Kristján Geir Pétursson lögfræðingur starfar með nefndinni. Gert er ráð fyrir að nefndin ljúki störfum á fyrri hluta árs 2011.