Bann gæti skapað hættu í höfunum

Utanríkisráðuneytið gerir ýmsar athugasemdir við frumvarp fimmtán þingmanna um friðlýsingu Íslands fyrir kjarnorkuvopnum og bann við umferð kjarnorkuknúinna farartækja. Árni Þór Sigurðsson VG er fyrsti flutningsmaður.

Í umsögn ráðuneytisins segir að markmið frumvarpsins sé í megindráttum í samræmi við yfirlýsta stefnu stjórnvalda en stangist á við skuldbindingar þeirra gagnvart þjóðarétti. Gangi það meðal annars gegn EES-samningnum og aðildinni að NATO.

Verði frumvarpið að lögum mætti ekki heimila skipi sem flytur kjarnakleyf efni eða kjarnorkuúrgang í tengslum við friðsamlega nýtingu kjarnorku og óskar að leita vars, að koma inn fyrir tólf mílna mörkin og draga þar með úr líkum á að skip farist og mengunarslys hljótist af.

Landhelgisgæslan er sömu skoðunar. Í umsögn hennar segir að hættulegt væri ef skip með geislavirkan úrgang fengi ekki að koma inn fyrir tólf mílurnar í neyð. „Það getur, svo dæmi sé nefnt, verið meiri hætta fólgin í því að vera með skip með geislavirkan úrgang rétt utan við tólf sjómílna mörkin þar sem hætta er á að gámar fari í sjóinn vegna slæms veðurs og sjólags heldur en að hleypa því inn fyrir tólf sjómílur til að komast í var,“ segir í umsögn Gæslunnar. Ísland sé alþjóðlega skuldbundið til að veita afdrep og skjól og tryggja öryggi mannslífa.

- bþs