Innlent

Eignir grunaðra verði gerðar upptækar án dóms

Eignir þeirra sem grunaðir eru um að hafa hagnast á glæpsamlegan hátt verða gerðar upptækar án þess að refsidómur hafi fallið, nái frumvarp Helga Hjörvars þingmanns Samfylkingarinnar fram að ganga. Íslendingar geta dregið úr skaðanum sem hlaust af bankahruninu með þessu úrræði segir yfirmaður frá Europol sem er kominn hingað til lands.

Helgi Hjörvar hefur lagt fram frumvarp um að nýr kafli um eignaupptöku bætist við hegningarlögin. Samkvæmt frumvarpinu mun ákæruvaldinu verða heimilt að krefjast upptöku eigna án þess að búið sé að höfða refsimál með útgáfu kæru.

Skilyrði fyrir slíkri eignaupptöku væri þá að eignirnar hafi orðið til eða verið notaðar við glæpastarfsemi. Ákæruvaldið þyrfti ekki að sýna fram á að refsiverð háttsemi sé hafin yfir allan vafa heldur einungis að það séu meiri líkur en minni á að ólögmætur ávinningur sé verulegur. Í frumvarpinu er einnig heimild til að óska kyrrsetningar til tryggingar upptöku ólögmæts ávinnings.

Eignaupptaka án sakfellingar er þekkt úrræði víða erlendis. Carlo van Heuckelom er yfirmaður fjármunarannsóknardeildar Europol. Hann er kominn hingað til lands til að halda fyrirlestur um úrræðið í Öskju á morgun. Auk þess sem hann mun eiga fund með sérstökum saksóknara og þingmönnum. Huklom telur að þetta úrræði yrði mjög gagnlegt hér á landi en úrræðið getur verið afturvirkt.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.