Neysluvatn í Hveragerði ekki mengað

 Ekki er arsenikk í drykkjarvatni Hvergerðinga. Þetta segir Elsa Ingjaldsdóttir, framkvæmdastjóri hjá Heilbrigðiseftirliti Suðurlands en bóndi í sveitinni segist hafa misst tvær kýr vegna arsenikk mengunar í drykkjarvatni.

„Það hefur ekki og mælist ekki arsen í neysluvatni í Hveragerði," segir Elsa en heilbrigðiseftirlitið sendi fréttastofu athugasemdir vegna frétta af arsenikk mengun fyrr í kvöld. Bóndinn Ingileif Steinunn Kristjánsdóttir framkvæmdi að sjálfdáðum rannsókn á tveimur kúm sem létust á bæ hennar og hélt því fram að arsenikk mengun hefði verið ástæða dauða þeirra.

„Hún er að taka sýni af kúnum en það verður að gera greinarmun á neysluvatni dýranna og þess vatns sem kemur úr vatnsveitu Hveragerðis. Það er mikið mál fyrir íbúa Hveragerðis og alla þá sem eru í þessari vatnsveitu að réttar upplýsingar komi fram og arsen hefur ekki mælst hjá okkur né annarsstaðar þar sem við erum að mæla."

Heilbrigðiseftirlitið vill koma því á framfæri að á visi.is og í kvöldfréttum Stöðvar 2 hafi því verið haldið fram að arsenmengun væri í neysluvatni Friðarstaða. Þetta segir heilbrigðiseftirlitið að sé ekki rétt.